30. júní 2009

Stefán Fr. þjófur og þjófsnautur hans Mogginn

Á íslandi hafa ítrekað fallið dómar yfir fólki sem deilir höfundaréttarvörðu efni án þess að hafa til þess heimild.

Einn stórtækasti þjófur Íslands heitir Stefán Friðrik Stefánsson og býr á Akureyri. Í nánu samstarfi við Moggann gerir Stefán þessi tónlist annarra aðgengilega hverjum sem vill, án endurjalds.

Stefán deilir um 450 eintökum af höfundaréttarvarinni tónlist. Þessi tónlist er aðgengileg hverjum einasta gesti sem á síðuna kemur. Mogginn leggur diskapláss undir tónlistina og viðmót svo gestir geti notið hennar.

Þegar þetta er skrifað hefur síða Stefáns verið opnuð 1113 sinnum af 891 IP-tölu í dag. Það má því gefa sér gróflega að 80% flettinga séu u.þ.b. fjöldi gesta, þ.e. aðila sem Stefán og Mogginn bjóða tónlistina.

Flettingar á síðuna eru frá upphafi 2.231.679.

Auðvitað hefur Stefán smám saman aukið úrval þýfisins. En við skulum leika okkur að hámarks- og lágmarkstölum yfir skaðann sem hann hefur valdið.

Á tónlist.is virðist hvert lag kosta um 200 krónur. Svo er eitthvað rusl á rétt innan við 100 kr. En Stefán er minnst í því. Gefum okkur því að meðalgreiðsla fyrir lag sé 150 kr.

Þannig gæti Stefán hafa boðið allt að 450 lög allt að 2.231.679 sinnum með aðstoð Moggans. Þar með væri verið að gefa verðmæti að upphæð 150.638.332.500 kr.

Að lágmarki er Stefán að bjóða sömu 1.000 einstaklingunum þýfið aftur og aftur. Þá ætti sekt hans að nema 67.500.000 kr.

Uppgefnar tekjur Stefáns samkvæmt úttekt DV eru 2.923 kr. á mánuði. Miðað við óbreyttar tekjur tæki það hann 4.294.627 ár að greiða hærri sektina en ekki nema 1.924 ár að greiða lágmarkssektina.

26. júní 2009

Jackson og stjarnan



Það er óefað að Michael Jackson var ári góður tónlistarmaður sem skaust í alvöru upp á stjörnuhimininn í hlutverki líks og hefur nú gert það aftur.

Það er hinsvegar óborganlega fyndið að aðdáendur goðsins hafi haldið líkvöku við gangstéttarstjörnu í Hollívúdd, kysst stjörnuna, beðið bænir og reynt að særa eigandann aftur til lífsins.

Og það er fyndið vegna þess að allt fór þetta fram við stjörnu Michaels Jackson útvarpsmanns, sem er í fullu fjöri.



Rétta stjarnan er undir teppi við frumsýningarstað Brüno.



Það er rétt að kveðja Jackson með þessu lagi sem hann söng með Freddie Mercury þegar til stóð að þeir sigruðu heiminn saman. Þetta er demo og textinn er ekki fullfrágenginn.



Það er samt forvitnilegt hvað Jackson syngur þegar Freddie segir honum að spinna (ad-lib). Freud myndi gera sér vettvangsferð úr því.

25. júní 2009

Galdrabrennur



Það er eitt sem gleymist yfirleitt þegar rætt er um galdrabrennur. Mikill meirihluti þeirra sem drepnir voru á báli voru – strangt til tekið – sekir. Fólk sem hélt sjálft að það væri rammgöldrótt og sat á sakamannabekknum og sendi galdramagnaðar eldingar með augunum á vitnin sem kjaftað höfðu frá. Eitthvað af þessu liði var náttúrlega klínískt geðveikt en þegar um er að ræða galdramenn og nornir þá hafa slíkar skilgreiningar voða lítið gildi.

23. júní 2009

Hið nýja þorskastríð



Síðustu þrjátíu ár hafa gert Íslendinga að skvapholda jakkafatainnyflum og mörhryggjuðum dragtdrottningum. Ég ætla rétt að vona að gamla fólkið, fólkið sem hefur þó enn örlítið kalk eftir í hryggnum, skammist sín fyrir afkvæmin og afkvæmi afkvæmanna.

Við háum núna nýtt þorskastríð. En í þetta skiptið er stríðið ekki háð um þorsk, það er háð af þorskum. Þurrkaða steinbítnum joð sigfússyni og varalitaða flúðasveppnum. Bæði eru þau huglausir kjarkgeldingar sem missa vatn í brækurnar um leið og sviðsljósið staðnæmist á þeim. Þau hafa enda enga stjórnunarreynslu. Eru litlu, pólitísku marflærnar sem leggja ekki í hafið – líður best í grunnu pollunum undir fjörugrjótinu.

Afkoma Íslands er í húfi. Alveg eins og í þorskastríðinu. Lögin liggja fram á bresku sveifina. Alveg eins og í þorskastríðinu. Hugrekki landsforeldranna til að takast á við ólögin er ekkert. Við munum tapa. Ólíkt þorskastríðinu.

Í þorskastríðinu hinu fyrra lögðum við hagsmuni bresks almennings á aðra vogarskálina og hagsmuni Íslendinga á hina. Við tókum að okkur að verja íslensku skálina. Bretar sáu um sína. Með staðfestu fengum við óréttlátum og úreltum lögum hnekkt.

Kostnaðurinn var gríðarlegur í Bretlandi og feysknar lappirnar gáfu sig endanlega undan fúnum fiskiþorpunum. Fjöldi fólks lenti í kröggum og tapaði lífsafkomunni. Töff sjitt sögðum við. Það er illt að reiða sig á blóðið sem kreist er úr steinum. Svoleiðis steinsugur mega búast við varaþurrk.

Núna höfum við fjármálaheim, byggðan á enn feysknari stultum en bresku sjávarþorpin á áttunda áratugnum. Hann er að hruni kominn. Eins og við er að búast hefst hrunið á jaðrinum. Stykkin falla eitt og eitt þar til ekkert er eftir nema miðjan, jafngildi merkimiðans á 33 snúninga plötunni. Þannig var þorskheimurinn líka að hrynja á sínum tíma.

Þá sögðum við stopp! Lögin eru siðlaus! Skítt með dómsstóla, ályktanir og reglugerðir. Nauðsyn brýtur lög. Ábyrgð okkar er gagnvart íslensku þjóðinni og framtíð hennar en ekki evrópskum lögum sem kveða á um líknardráp þjóðarinnar.

Við tókum slaginn. Og þótt við hefðum tapað hefðum við fallið í bardaga, fallið með sæmd. Endað í Valhöll.

Í dag er engin sæmd eftir. Ekkert hugrekki. Stjórnmálamennirnir lúffa og tala um evróputilskipun eins og hún sé eitt af boðorðunum tíu. Tala um hjálparsamtök og elliheimili sem tapa peningum á óseif. Tala. Ala í brjósti sér von um farsæla lausn. Vináttu við stórveldi með betri tíð og blóm í haga.

Það þarf að senda þetta fólk í sögu 101. Stórveldi eiga ekki vini. Bretar og Hollendingar eru örgustu afræningjar mannkynssögunnar. Deitreiparar frá blautu barnsbeini.

Steinbíturinn og flúðasveppurinn eru ekki vinir okkar heldur. Þau eru gamaldags nýlenduhyski. Dönskuslettandi mannleysur eins og þeir sem flöðruðu upp um stofuveggina á Bessastöðum öldum saman. Eyddu öllum tímanum í líffærafræði Millilandafrumvarpsins en höfðu enga hugsjón um frelsi. Enga hugsjón um varðstöðu fyrir þjóðina. Engan kjark.

Fari þau fjandans til. Allt er betra en þetta.

Hendum jakkafötunum á haugana og tökum fram togvíraklippurnar.

Förum í stríð við andskotans Bretann. Tökum slaginn. Bretar hafa ekki unnið stríð áratugum saman. Við erum með óspjallaðan feril.

Frekar til Valhallar en Heljar, þótt leiðin þangað sé þyngri.